السيرلانكي العاشق للخنيفر

بنقرات أصابع: (شارع العطايف)

قد تعرفون أو لا تعرفون الأستاذ محمد الخنيفر أحد الرواد السعوديين في عالم الكاريكاتير الذين أبدعوا وتواروا عن الأنظار. الخنيفر هو أول رسام كاريكاتير سعودي أبتكر تعويذة سعودية وهي بالتأكيد سلطانة البنت العاقلة والمثقفة والتي تحاول أن تنتقد الكثير من التصرفات والظواهر الاجتماعية هي وعائلتها المكونة من أبوها المتسرع والنزق اللي يخانق ذبان وجهه والهلالي طبعاً وأمها المرأة المنكسرة والمغلوبة على أمرها وأخوها الصغير مسعود الأصلع, طبعاً هو أول فنان كاريكاتير تنشر له رسومات بالألوان ويعتبر صاحب السبق في هالمجال.

المقدمة البسيطة هذي عشان أقولكم أنه مو بس السعوديين اللي كانوا معجبين بالخنيفر حتى الأجانب ومنهم سواقنا السيرلانكي وهذي قصة طريفة. لا يخفى عليكم مدى أهمية الركوب في المقعد الأمامي للكثير من الأولاد وطبعاً هذي القضية اليومية لإخواني كل صباح من اللي يركب جنب السواق.

ويبدأ المسلسل اليومي كالتالي .. يالله يصحون للمدرسة وأنواع الأعذار اللي بطنه واللي مصخن أو إن المدرس دايم يطقه على الفاضي والمليان وطبعاً كل هالمحاولات دائماً ما تبوء بالفشل مع الوالدة رايحين رايحين الله لا يعوق بشر. يبدأ الفطور وشوي كل واحد يسحب شنطته يسابق الثاني على السيارة من اللي يركب قدام بس غالباً ما تكون الغلبة للكبير فيهم بعد المطاقة وكانوا قبل ما يروحون للمدرسة يمرون على البقالة عشان يشترون الجرايد للوالد والسواق (أسمه طه) كان عنده مزاج بكاريكاتير الخنيفر يخلي أخوي يقرأ الكاريكاتير ويترجم له معنى الكاريكاتير طبعاً ما يترجم له بالانجليزي يترجمه باللغة العربية المكسرة حقت الهنود والسيرلانكية وأسمع ضحك السيرلانكي كل يوم على الكاريكاتير وفي يوم أصر أخوي الأصغر على الركوب قدام وراحوا للبقالة كالعادة وطبعاً لازم يقرأ للسواق وهنا طب في مشكلة كان صغير وفي القراءة لك عليه وما عرف يقرأ ولا يترجم ولا يفوتكم الثاني اللي قاعد وراء مستمتع بالموقف أخوه في امتحان صعب وما يبي يغششه وحاول يستعين فيه بس لا حياة لمن تنادي, هنا أنقلب مزاج السواق وقام يصرخ على الصغير (إنتا ما فيه أعرف شي .. إنتا ما فيه يدرس كويس .. ما فيه أركب قدام على طول وراء) هههههههه

وبعدها ما عاد وطوط عند الكرسي اللي قدام أبد. وظل السواق مستمتع بكاريكاتير الخنيفر ألين رجع لديرته.

طبعاً هالموقف صار له أكثر من خمسة وعشرين سنة. هذه التدوينة تحية عطرة وكبيرة للفنان محمد الخنيفر أحد أبرز المدونين السعوديين الأوائل الذين وصفوا حال المجتمع السعودي ونقدوه وأمتعونا بالريشة والألوان. وأيضاً تحية لسواقنا طه الله يذكره بالخير.


أرسلها عبر الفيس بوك
انشرها عبر تويتر

10 responses to “السيرلانكي العاشق للخنيفر”

  1. ظمأ القلب

    
ولأن له أسلوبُ ممتع في الكاريكاتير
جذب الكثير لـ متابعة جديده بشغف
    ههههه من جد السواق ضاربة
فيوزاته من الحماس

  2. بو تركي

    ابو عبدالعزيز ليتك ما كتبت ابرك من ها الخثرقه الى مالها سنع لوك متصل على عطيتك موضوع قلت السولف عندك كلمني وانا اوريك اخر مره اسمحلك

  3. faye

    يحليلة طه يذكرني بسواقي الباكستاني محمد هم كان له مسكة بس مو بالكاريكاتور كان كل ما اطلع من المدرسة مسوي حفل غنائي لنانسي عجرم على اغنية يا طبطب و بالنات يطلعن دايم عشان يشوفن هزه.
شكرا على التذكير بالذكريات المحرجة

  4. مازن السيف

    ولك أخي شارع العطايف أحلى تحية لأسلوبك المميز في طرح الأفكار وكم أتمنى أن تكشف عن هويتك قريباً لأنك مبدع

  5. ابو رائد

    انا صديق قديم للاخ محمدولقد أشرفت له على طباعة اول أعداده من اضحك للدنيا ولقد تركت السعودية قبل حوالي 17سنة ارجو مساعدتي بالاتصال مع الاخ محمدضروري شاكرا
    ومقدرا لمن يوصلني به لاني والله في شوق كبير له.تلفوني في الاردن عمان0795807833_ kareemalbaz@yahoo.com

  6. ابو رائد

    محمد رسام مبدع وفنان وصاحب اخلاق عالية

  7. ناصر

    اقول يا لبى قلب الخنيفر والله اني من أشد المعجبين لهذا الرجل منذ أكثر من عشرين سنه
    ياليته يرجع لنا …

  8. خالد القحطاني

    اولا :السلام عليكم وكل التقدير للكاتب وصاحب الفكرة .
    ثانيا :انا من اشد المعجبين بالفنان القدير محمد الخنيفر كنت اتابع مجلته المشهورة وللأسف كنت محتفظ فيها … عليه اسلوب قسم بالله اني ابحث عن مجلته اضحك للدنيا بأشتريها ووصيت عليها بس مافيه فايده .
    ياليت احد يعرف له عدد او اكثر بس اصور ولون واحتفظ فيها لنفسي يانااااااااااااس ذكرايات حلوه .
    تكفون تكفون تكفون ابي محمد الخنيفر يرجع بشكل او بآخر وياليت يعيد انتاج مجلته المشهورة (اضحك للدنيا) والله يابيصير عليها طلب .
    يازين القصص اللي فيها عباس ودباس وكباس اللي يشجعون فريق النجوم وابو سلطانه يشجع الهلال لا وبعد العزايم والطلعات يوم يضيع زيد ولد ابو سلطانه ويلحقون العصابه في البر ويساعده ولد عمه ومعه الكلب شيبوب وينقذهم والله اني مشتاق جدا .
    ارجوكم ابي اعداد اضحك للدنيا بأي شكل من الأشكال .
    لا عدمناك ولا عدمناكم ياغالين يالأحباب .

  9. Malak

    الخنيفر كام فنان مبدع ترك بصمته في طفولتنا و في ذكرياتنا
    لا ننساه ولا ننسى كاريكاتيراته الهادفة و الممتعة
    كنت أسأل عن أي شيء لم أفهمه
    أتذكر (الألوية الحمراء) سألت عن هذه العبارة وقتها ^_^

    ألف شكر لك أخي على مشاركتنا هذه الذكريات الجميلة مع سائقكم طه الله يذكره بالخير والله يطيل في عمره بطاعة الله إن كان مايزال يعيش والله يرحمة إن كان قد توفي

    ذكرياتك لامست ذكرياتنا
    و أيقظتها

    و نقف أحتراماً لمحمد الخنيفر.

  10. Tyson F. Gautreaux

    I just want to mention I am new to weblog and seriously loved you’re web blog. More than likely I’m planning to bookmark your website . You really come with tremendous posts. Kudos for sharing with us your blog.

اترك تعليقاً