الشماغ

بنقرات أصابع: (شارع العطايف)

هلا بالغالين هلا بقراء مدونة ياسر الغسلان
كنت أنا وياسر نسولف قبل كم يوم عن ملابس الشتاء وجرتنا السوالف إلى سيرة الشمغ دنهل أحسن وإلا كينزو وإلا البسام. فقلت له تدري يا أبو عبدالعزيز أنه شماغ البسام يوم من الأيام كانت عملة صعبة في الرياض هالكلام قبل أربعين سنة تقريباً وقعد يضحك ويتهزأ ويذب
علي ويقول أجل أنا في دولابي ثروة وأنا مدري. قلت له لو أنك تبسط بالشمغ اللي عندك في سوق أوشيقر ذيك الأيام كان الحين أنت هامور. هنا فطس ضحك عشان كذا بسولف لكم عن هالموضوع.
كانوا الشباب طالعين للبر والبر اللي أقصده يمكن أقرب ماله حي النخيل الغربي الحالي طريق صلبوخ بس لا تفوتكم أسماء الشلة القشطة (عشانه أبيض) وستيف (عشانه قوي) والطير (عشانه هبت ريح وشقردي) وفقاش البيض ( من كثر ما يطب على العشش ويسرق البيض) الطاروق (هذا عاد زينة الجلسة لأن صوته حلو بالسامري ويطق على الطار ومحد يزعله) أتحداكم تعرفون أنا أي واحد منهم.
المهم والشباب يتمشون شافوا أكرمكم الله حمار حساوي كبير ما يدخل من الباب طبعاً الحمار الحساوي هذيك الأيام يعتبر شي مهم وغالي وله وزنه زي الكاديلاك قام واحد منهم وقال إذا ماله صاحب أباخذه وجره وجلسنا بالليل عند الضو (النار) وخوينا يدلل الحمار ويسولف معه يبيه يتعود على صوته وشوي ركب عليه وقمنا وحمينا سيخ الشوي على النار وكوينا الحمار وأنطلق يرافس ويركض وخوينا ما هو راضي يفكه وحنا وراه نقوله فكه فكه وهو مصمم ما يفكه, ألين طاح من عليه ووقف الحمار وجيناه وهو منتهي وتعبان وقلنا له ليه ما تركته الله لا يرده وش تتوقعون كان الرد:
قال: والله ما أفكه لو أموت أنا رابطه بشماغ البسام !!!!! ههههههه
والسالفة الثانية .. سلمكم الله هذا قريب لي كان يشتغل في ديوان الملك سعود وفيه وفد عراقي جاي ضمن الوفود العربية وقام رئيس الوفد وقال يا أخوان عندي توصيه من العراق ناس موصيني أجيب لهم شماغ البسام وقاله قريبي عسانا نقدر ناخذ لكم أكثر من وحده هي وحده ويالله. المهم راحو للمحل وقاله قريبي هذا الرجال ضيف الدولة ويبي شماغ البسام بس يبي درزن وشهق البياع وقال معصي صعبه جداً. المهم أخذ ورد ومفاوضات السلام وقريبي يحلف له والله مهيب لي والله للضيف …. يالله وافق يعطيه ثمان حبات بس.
طيب سؤال أخير ليه شمغنا لونه أحمر وأبيض وشمغ عرب الشمال (العراق والشام لونها أسود وأبيض الله يرحم ياسر عرفات) لا تفكرون ولا تفتحون الجوجل مسوين صايديني أبقولكم.
الشماغ الأسود والأبيض كانت من ضمن اللباس الرسمي للجيش العربي (جيش الثورة العربية أيام الأمير فيصل بن الشريف حسين أيام لورانس العرب) ومن صفات الجندي العربي عشان يفرق عن الجندي العثماني كان يلبس الشماغ والعقال وكانت بريطانيا تدعم جيش الثورة ومن ضمن الدعم ترسلهم ملابس الجيش وفي يوم وصلت دفعة جديدة من الشمغ بس لونها أحمر المصنع من كثر الطلب ما قدر يوفر اللون الأسود فعطوهم اللون الأحمر وهنا رفض الجيش بكامل طواقمه لبس اللون الأحمر يعني عيب وعار (أول مره يجتمع العرب على كلمة وحده) طبعاً الانجليز ما والله يرجعونها فصاروا يهدونها لرؤساء القبائل في الجزيرة العربية ويعطونهم فلوس عشان يقبلون ياخذونها فأنتشرت بين قبايلنا أن الشيوخ يلبسونها ويهدونها اللي هي الحمراء فأنتشرت وازدهرت تجارة الشمغ الحمراء عندنا ألين وصلنا ليومنا الحالي وعليكم العد كم من ماركة وكم من نوع وكم من موديل في السوق.
شاكر ومقدر وقتكم معنا.